*انا مبسوط والمزاج مظبوط بعد ماشباك ابوجا استقبلت ال 4G يعني قبل حتي ما نتعرف علي التشكيلة الجماعة استقبلو هدف (تسخينة)  وطبعا ناس ( لعبنا كويس ) قالو في امل و (باكر يعود القاش وترجع عيونو حنان)  والحكم ذاتو عضد علي الأمل دا بطرد لاعب من صن داونز وياهو سيناريو مباراة القمة لكن القوون المبكر دا ما كان في الحسبان المهم امل عايزة تقرأ الثاني كبس ياسلام الكلام دا حلم ولا حقيقة ياخ دي الجوهرة (الزرغاء) كل الضرب دا بعد الإصلاحات الكثيرة والحرب الضروس عشان متطلبات الكاف الا معاكم حق تعملوا كل الممكن وبعض المستحيل عشان الأزرق الغير عاتي يلعب في استادو عشان بالطريقة دي بره الحكاية ماكانت بتقيف في ال4G والمازمبية كانت جاية جاية الا طلعتوا مفتحين ومجضمين الكفر جهزتوا الملعب البخلتو بيه علي أندية الوطن وعملتوا ليو قائمة اسعار مختلفة واحده للمساء واحدة للنهار .

*وعلي زكر النهار  الجماعة عاملين فيها مفتحين بلعبوا مبارياتهم بالنهار عشان يستفيدوا من حرارة الطقس ويأثروا علي الضيوف ،  الا نسوا حرارة القلب اهم من حرارة الطقس  ،  اها الأمل لسه كان قائم رغم النفس القائم في المقصورة الوصلت فيها الالفاظ لدرجة كانت تستاهل نطلع فاصل اعلاني  ( استيم تفاح ) وفي اللحظة ديك ( حسيت زي كاني مزبوح بمنجل) توف الثالث كبس اللهم لانسالك رد القضاء وإنما نسألك اللطف فيه الجماعة ديل بالطريقة دي بتفرتقوا ونحن ماعايزنهم يتفرتقوا عشان بفرقوا علينا ونحن صراحة كدا بنستمتع جدا طيب القصة دي مش الحكم مفروض يشوف ليهو ليها صرفة الا جد كمان الحكم ماقصر بدري بدري طرد لاعب من صن دوانز يازول انت جادي يعني هسي الجماعة ديل لاعبين ناقصين واحد يعني لاعبين بعشرة بس وبعد دا مسيطرين كدا وشباك ابوجا دي خلوها فاتحة علي البحري .. تصدق يامؤمن دا الحصل بالضبط.

*طبعا عشان ما ننسي الهلال جاب قوون اي جابو ياسر مزمل في غمرة الأحداث الجماعة قلصوا الفارق الا اريتو كان نفعهم والله قوون شحتفة روح ساي قول لي ليه .. تهئ تهئ تهئ كبسوهم بالرابع توف جيب من جوه ابوجا كره اليوم البقي فيهم حارس مرمي ذاتو أربعة ديل ضيوف شنو الدمهم تقيل ديل وحالتو الجو حار والسخانة مولعه والغريبه الفريق دا في اربعه مباريات جاب ثلاثة اقوان بس حصد بيهم عشرة نقاط وجاء في جوهرة الهلال والشمس في كبد السماء عمل حركته  الظريفة في شباك ابوجا ال 4G ، بالمناسبة الحكم برضو ماقصر بعد الطرد اداهم ضربة جزاء الغربال ضيعها الا الود اباذر ميسي ختاها في الشبكة ..

اكثر وضوحا 

*كورة شاتوها من الشقيلاب من جم دكان الشايقي  دخلت في ابوجا في ستاد الهلال وحالتو دا قالوا عليه مستقبل الحراسة في السودان بالله المرمي دا لو خليتو فاضي ما كان احسن ليكم ..  جزر القمر في بطولة الأمم الأفريقية وقفوا لاعب بدل الحارس قدام الكاميرون صاحبة الأرض والجمهور مادخلت شباكه قدر أهداف ابوجا دي.

*متعة كرة القدم في الأقوان علي قول كابتن لطيف ولكن متعة المحاورة برضو حلوه وظريفة خصوصا لمن الحارس يحاور المهاجم ومحاورة حارس صن داونز  للغربال كملت لوحة الجمال .. والله سمحة شديد.. زمان كان بنقول شرط اها دي شرط الشرط ذاتو.

*الحكم دا شرب شاي باليانسون ولا ماشرب شاي اساسا العليو عملوا يعني اكثر من يطرد ليكم لاعب من قولة تيت ويديكم ضربة جزاء يعمل شنو يخش يلعب معاكم ولا الفهم شنو.

*عشان يخففوا علي جماهيرهم التخدير اشتغل قالوا شنو عندهم أمل يعني يمشوا القاهرة يضربوا الأهلي ويصعدوا هم بالله شوف ال 4G ديل بحلموا وهم صاحيين ناس غلبتهم في ستادهم وبسخانتهم ماشين يغلبوا في الجو البارد .. يادمكم ياخ.

*الحمدلله مجلس إدارة نادي المريخ اتخذ القرار الصحيح والذي تأخر كثيرا بإنهاء تعاقد الانجليزي لي كلارك ومعاونه المصري ( الحشري ) اسلام جمال المعد البدني المركب مكنة مدرب عام.

مجرد سؤال 

*أمل بتاع شنو ؟؟